هۆنراوەکانی کرمانج گەردی

بژی بۆ ژیان به‌ڵام مه‌ژی بۆ که‌سێك

که‌ ده‌تخاته‌ گێژاوی ژیان

چاوه‌کانــــــــــــــی

چاوه‌کانی

ملوانه‌که‌یه‌کی گه‌ش و جوانن

له‌ ئاسمانی تاریکی شه‌ودا

وه‌ك مانگ و ئه‌ستێره‌کان

پانتایی ئاسمانه‌ تاریکه‌کانم ڕووناك ده‌که‌نه‌وه‌

کاتێك خۆر

ئاسمانی زه‌ویش جێ دێڵێ

ئاسمانی من هه‌رده‌م رۆشنه‌

به‌ چاوانی....

ئیتر چیم بوێ له‌ دونیا

جوانی... خۆشی... شادی

نــــــــــــــا... نــــــــــــــا

به‌ ته‌نها چاوه‌کانی

 بۆمن سێ به‌شن له‌ دوونیا

چاوه‌کانی ...

چاوه‌کانی ...

ـــــــــــــــــــــــــــــــــــــــــــــــــــــــــــــــــــــــــــــــــ

(کرمانج گه‌ردی)

بگه‌رێـــــوه‌

ئه‌م شه‌و...

به‌ چاوه‌ فرمێسكاوییه‌کانمه‌وه‌

هاوارو ناڵه‌م ده‌رده‌بڕی و

ئه‌ستێره‌کان گوێیان بۆ شل کردبووم

غه‌ریبم ... غه‌ریبم ...

وێردی سه‌ر زبانم بوو

ئه‌ستێره‌کانیش نزاکانی منیان بۆ په‌روه‌ردیگار

به‌رز ده‌کرده‌وه‌...

دووری تۆ ...

شه‌وو رۆژی لێ به‌رێ کردم

تکام له‌ فریشته‌کان ده‌کرد

تا ئه‌هریمه‌نه‌کان له‌ دڵی تۆدا ده‌ربهێنن

تۆش ئه‌وکات دڵت پێم بسوتێ و بگه‌رێمه‌وه‌ ...

فرمێسکه‌کانم بسڕمه‌وه‌ ...

سکاڵای چاوه‌کانم بۆ دڵم ئه‌وه‌بوو

چیتر سه‌رچاوه‌ی ئه‌سرینه‌کانم وشك مه‌که‌

تا له‌کاتی گه‌رانه‌وه‌ی دا بتوانین فرمێسکی خۆشی دابه‌زێنین

ده‌ی بگه‌رێوه‌ ...

وه‌ك به‌هار

دڵ و چاوو رۆح و ...

له‌ چاوه‌روانی تۆدان

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( کرمانج گه‌ردی )

فریاد ره‌سم بکه‌

دڵگران مه‌به‌ . . .

له‌ هه‌رشتێ ده‌ری ده‌برم

له‌ بێ تۆیی

شه‌وان خوێنی خۆم ده‌خۆمه‌وه‌

جه‌رگم له‌ت له‌ت... گیانم پڕ ئازاره‌

تۆ . . .

شه‌پۆلی ره‌شه‌بایه‌کی توره‌یی

چه‌تری ژیانم لاده‌به‌ی

ده‌وه‌ره‌وه‌ تۆش

وه‌فایه‌ك... سۆزێك بنوێنه‌

به‌هارێکی نه‌براوو بۆ منی پایزاوی

بخولقێنه‌...

من چیم هه‌یه‌ . . .له‌یاری عه‌شق دا بیدۆزمه‌وه‌

خه‌مم زۆره‌و شادیشم نیه‌

ئیتر ده‌تۆش

کلیلی ده‌رگای ژیانێکی نوێم بده‌رێ

تاکو دواهه‌مین هه‌ناسه‌ی سارد

له‌ قورگی شه‌قاربۆوه‌م

بێته‌ ده‌رێ . . .

ــــــــــــــــــــــــــــــــــــــــــــــــــــــــــــــــــــــــــــــــــــــ

( کرمانج گه‌ردی )

گــــوڵی خــــه‌مگیــــن

له‌ یه‌که‌م نیگاوه‌

تا بارانی به‌م دواییه‌ت

دڵم هه‌ر تینوی عه‌شقی تۆیه‌ و

گوڵدانی باڵآته‌

شه‌وو رۆژ بێ کۆتا

تامه‌زرۆی ئاوازی ده‌نگته‌

تۆ گوڵی

تینوی دڵۆپێ ئاوی سازگاری

منیش بارانی چاوه‌کانم

پانتایی گوڵدانتی داپۆشیوه‌

بۆ تینوێتیت ناشکێ؟

که‌م باریووم یا هێشتا تینوتری !

من بارانی بیابانی دڵ بووم

ئاسمانی هه‌وره‌کانی بارانم

به‌ تینوێتیت وشك بوو

ئه‌م شه‌ویش چاوه‌کانم هێنده‌ گریاوه‌

بۆ بیابانی دلی تۆ

کوێربووم.... کوێربووم

له‌ عیشقت تێر نه‌بووم و

چاوه‌کانیشم نیگاکانی تۆیان له‌ده‌ستدا...

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( کرمانج گه‌ردی )

پێکه‌نین

وه‌ك مانگی سپی

له‌ تاریکی شه‌ودا

له‌ بڵندی ئاسمان ده‌دره‌وشامه‌وه‌

وه‌ك کۆترێ

له‌ شه‌قه‌ی باڵم ده‌داو

هێمن... هێمن

به‌سه‌ر مه‌مله‌که‌تی بێ ده‌نگیدا

ده‌خولامه‌وه‌

دنیا کش و مات

له‌ وێرانه‌ ده‌چوو

ته‌نانه‌ت چرکه‌یه‌کیش نه‌ده‌بیسترا

له‌ ناکاوێ

به‌ ده‌نگێکی به‌هێزو پر له‌سۆزه‌وه‌

پێکه‌نینێکم بیست

ته‌واوی ئه‌و مه‌مله‌که‌ته‌ی ده‌هه‌ژاند

به‌دوای گه‌رام بست به‌ بست

ده‌بێ پێکه‌نینی چ بێ؟؟؟

منداڵی تێربوو له‌ شیری دایك

یا هه‌ڵهاتنی خۆری نیشتیمان  !

هێدی ‌هێدی به‌دوای پێکه‌نین بووم

له‌ پڕێکا بینیم ! !

کیژۆله‌یه‌کی خنجیلانه‌بوو

به‌ سواری ئه‌سپێکی به‌غار

به‌ده‌م قاقای پێکه‌نینه‌وه‌

رازی بوونی دایکی

ده‌گه‌یاند به‌ خۆشه‌ویسته‌که‌ی !...

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

( کرمانج گه‌ردی )

ئاوێنه‌ی ناپاك

تف بکه‌ له‌بارانی چاوه‌کانت

که‌ به‌شه‌کانی ئاوێنه‌

له‌ چاوه‌کانت له‌دایك ده‌بن و

تامی سێوت لێ تێک ده‌ده‌ن

پێ مه‌که‌نه‌ به‌ زه‌رده‌خه‌نه‌ی ئاوێنه‌

که‌ پێناسه‌ی ته‌مه‌نت بکا

ڕه‌نگه‌ له‌کاتی له‌دایك بونه‌وه‌ت

زگماکت بکا

دڵ خۆش مه‌به‌ به‌ وته‌ شیرینه‌کان

سه‌رسام مه‌به‌ به‌ رێزو گوڵ بارانه‌کان

فریووت ده‌دات و

له‌ نێو زیندانی عشقدا

پێشوازی له‌ قژی سپی و

چاوی کزو کۆخه‌ کۆخی پیری ده‌که‌یت

ئاوێنه‌که‌ت بێ ئاگایه‌

له‌ نمایش کردنی ده‌نگی بولبول و

ئاوازی ناسك

بێ ئاگایه‌ له‌دایك بوونه‌وه‌ی پاش مردن

 بێ ئاگایه‌ له‌ خۆشه‌ویستیت بۆ ئه‌و

بۆیه‌ عاشقی عاشق نه‌بوونته‌ و

باخه‌وانی تاڵ کردنی سێوه‌

شه‌یدای بیابانی ته‌مه‌نته‌

عه‌وداڵی ژیانێکی بێ هوده‌ته‌

ــــــــــــــــــــــــــــــــــــــــــــــــــــــــــــــــــــــــــــــــــــ

کرمانج گه‌ردی